VETFRIKKIES

Frikkadelletjies -

1kg Maer maalvleis

250ml Oats

50ml Sagte broodkrummels

50ml Wit asyn

4 Eiers geklits

1 Groot aartappel, grof gerasper

15ml Sout

5ml Gemaalde koljander

5ml Gemaalde neutmuskaat

5ml Gemaalde wonderpeper

2ml Peper of na smaak

Meng al die bestandele vir die frikkadelletjies saam.

Ek gebruik 'n 25ml maatlepel om die hoeveelheid vleis af te meet om bolletjies te vorm.

Braai frikkadelletjies in diep olie net tot gaar.

Plaas op kombuispapier om te dreineer en heeltemal af te koel.

Vetkoek -

250ml Sterk lou melk

250ml Sterk lou water

40g (50ml) Margarien

25ml Witsuiker

1 Eier

850g (1600ml) Koekmeelblom

10g (1 Koevertjie) Kitsdroëgis

5ml sout

Meng melk, water, margarien en suiker en roer tot margarien gesmelt het.

Klits die eier by.

Meng meel, sout en gis saam.

Voeg eiermengsel by.

Knie tot die deeg elasties en glad is.

As die deeg te pap is om te hanteer kan bietjies koekmeel bygevoeg word.

As die deeg te styf is voeg 'n klein bietjie water by.

Smeer 'n mengbak met olie en plaas die deeg daarin, draai die deeg dadelik om sodat die oliekant bo is.

Bedek die bak en laat die deeg rys tot dubbel die volume.

Knie die deeg af.

Rol deeg uit op meelbestrooide oppervlak tot ongeveer 1cm dik.

Sny deeg in 6 x 6cm blokkie met 'n skerp mes.

Plaas 'n frikkadelletjie op elke blokkie en vou die punte van die deeg oor die frikkie.

Knyp die openingkies versigtig toe.

Braai so vier op 'n slag in diep olie en  draai dikwels om sodat die deeg egalig braai.

Braai tot ligbruin en skep uit om te dreineer.

Sit warm of koud voor.

Hulle vries goed om later weer warm gemaak te word in die mikrogolf oond.

Lewer ± 50 Frikkies